5 મી જુલાઈ 1960 ના રોજ ગુજરાત રાજ્યના અમરેલી ખાતે શ્રી હરીબાપા અને શાંતાબાના ત્યાં ચુનીભાઈનો જન્મ થયો. લક્ષ્મી ડાયમંડના માલિક એવા ચુનીભાઈને પાંચ ભાઈઓ અને એક બહેન છે. એક અતિબૌધિક અને સમાજ પ્રત્યેની જવાબદારી સ્વીકારનાર વ્યક્તિ તરીકે તેઓ હંમેશા સેવાકીય પ્રવૃત્તિઓ સાથે જોડાયેલા રહે છે.

1972 માં તેઓ આર્થિક ઉપાર્જન માટે માદરે વતન અમરેલી થી સુરત આવ્યા. અહીં તેમણે રત્નકલાકાર તરીકે તાલીમ શરૂ કરી અને અનેક સમસ્યાઓનો સામનો કરી કઠોર પરિશ્રમના સથવારે ટૂંક સમયમાં જ ઉત્તમ કારીગર તરીકે પોતાને સ્થાપિત કર્યા. ત્યારબાદ મોટાભાઈ શ્રી વસંતભાઈ ગજેરાએ સ્થાપેલી ‘લક્ષ્મી ડાયમંડ’ માં ભાઈઓના સાથ અને કઠોર પરિશ્રમના સથવારે લક્ષ્મીડાયમંડનો વિસ્તાર વધારવામાં સફળતા પ્રાપ્ત કરી. દેશ – વિદેશમાં પણ તેની ઓફિસ ખુલવા લાગી. 1995 થી પ્રતિષ્ઠિત એવા DTC સાઈડ હોલ્ડર બનવાનું શ્રેય પણ લક્ષ્મીડાયમંડને મળ્યું. આજે સમગ્ર વિશ્વમાં લક્ષ્મીડાયમંડ હીરા તૈયાર કરવામાં તથા એક્ષપોર્ટમાં અગર હરોળમાં સ્થાન ધરાવે છે.

કંપનીએ અનેક વિશ્વપ્રસિધ્ધ એવોર્ડસ મેળવી ખ્યાતિ પ્રાપ્ત કરી છે. સાથે-સાથે લક્ષ્મી ઇન્ફ્રા ડેવલોપર્સ લિ. શાંતિ એન્ટરપ્રાઈઝ જેવી અનેક કંપનીઓ શરૂ કરી અને આ તમામ કંપનીઓ સતત વિસ્તરી રહી છે.